گۆشتی قوربانی و ڕۆژی جیهانی خۆراک.
(بەسەرهاتی سەتڵە ئاردەکە).

  ن/ حسێن نەجمەدین قەرەداغی
بەشی دوو ەم و کۆتایی.
لەساڵی ٢٠٠٨ دا وەک نوێنەری ڕێکخراوی رابیتەی خێرخوازی بانگهێشتی کۆنگرەیەکی نێەدەوڵەتی رێکخراوی نەتەوە یەکگرتووەکان کرام لە شاری دوبەی لە ئیمارات .
ئەو کۆنگرە ساڵانە بوو، نوێنەرانی رابیتە چەند ساڵێک وەک ڕێکخراویکی خاوەن ئەزموون و کاریگەر و خاوەن پڕۆژەی سودی گشتی  بۆ ئەو کۆنگرەیە بانگهێشت دەکراین و بەشداریمان دەکرد.
لەو ساڵەی کە من و چەند هاوکارێکم  نوێنەرایەتی رابیتەمان دەکرد، کۆنگرەکە تایبەت بوو بە باسی خۆراک و گرفتی چەند ولاتێکی هەژار ، پاشان ئەو چین و توێژە کەمدەستانەی لە وڵاتە جیاوازەکاندا  بەهۆی هەژاری یان گەندەڵی و خراپی سیستەمی ئیدارەدان ناتوانن خۆراکی پێویستی خۆیان بە پێی ستاندارە نێو دەوڵەتیەکان فەراهەم بکەن.
ئەوەی جێگەی سەرنجی من بوو، لە کاتی وتاری نوێنەری ڕێکخراوی نەتەوە یەکگرتوەکاندا سەتلێکی سوری بچوکی ( بەقەبارەی سەتلێکی ماستی دوو کیلۆیی دەبوو) لەگەڵ خۆی هەلگرتبوو بردیە سەر ستەیچەکە ، هەر لەسەرەتای ووتەکەیدا وتی:
دەزانم ئەم دیمەنەتان لا سەیرە!، پرسیار لە هۆکاری هێنانی ئەم سەتڵە بچوکە دەکەن؟
من بەم دیمەنە دەمەوێت ئەوەتان بۆ ڕوون بکەمەوە ، لە بە خشینی کەم شەرم نەکەن، لە ڕێگای رێکخراوەکانتانەوە هانی هاولاتیان بدەن ،بەخشینی کەم بە  بێبایەخ مەزانن، بۆ نموونە : بەخشینی تەنها (١)یەک دولار پڕی ئەم سەتڵە ئارد دەکات، چەند نان لەو ئاردە دروستدەکرێت ،بەرهەمی ئەو بەخشینە بۆ ماوەی  ڕۆژێک مرۆڤێک لە برسیەتی و مردن رزگار دەکات. ئەمە هۆکاری هێنانی ئەم سەتڵە سوورە بچوکە بوو بۆ سەر ستەیچی کۆنگرە.
تێبینی:
١- ڕێکخراوی نەتەوە یەکگرتووەکان لە ئەجنێدای کاردا ڕۆلی ئاین بە گشتی و ئاینی ئیسلامی  بەتایبەتی فەرامۆش کردوە، کە هاندان و فەرمانکردنی زۆری بە بەخشین و فریاگوزاری هەیە، ئەمە بۆچی؟ بەکورتی چونکە :ئایدۆلۆجیانە مامەڵە دەکەن، نەک مرۆڤ دۆستیانە.
٢- سیستەمی سەرمایەداری لە پێناوی سود و قازانجی چەند گەورە کۆمپانیایەکدا ، ئامادەیە هەموو مرۆڤەکان نەک برسی بکات. بەلکو بیکاتە قوربانی سود و مامەڵەی کایە بازرگانییەکان . ڕێکخراوی نەتەوە یەکگرتوەکانیش هیچی پێناکرێت ، هەندێ جار دەبێتە ئامرازێک بەدەست زلهێزەکانەوە.
٣- جیاواز لە رێکخراوی نەتەوە یەکگرتوەکان ، لە زۆربەی ولاتاندا ڕیکخراوەکانی کۆمەلگەی مەدەنی بە هاوکاری خێرخوازان لە دەرەوەی بودجە و میزانییەی قەبەی حکومەت، بە بەخشین و داهاتی تایبەتی خۆیان برسییەکان تێر دەکەن، فرمێسکی بێباوکان دەسڕن، هەزاران پڕۆژەی ئاوەدانی و پەروەردەیی و ڕۆشنبیری و گەشەپێدان  راستدەکەنەوە، بەمەش لەنگەری هاوسەنگی ژیان ڕادەگرن و بەردەوامن، ئەمەش ئاماژەیەکی هیوا بەخشە، ئومێدی هەزاران خێزانی جێبەجێکردوە و سوپاس بۆ خودا  تا ئێستا بەردەوامە.